بوابة الأخبار العربية تأسست وكالة A N G عام 2009 على يد الفنان والكاتب الصحفي ناصر عبد الحفيظ 
كتبت : فاطمة سعد
من أسوأ الحاجات في انك تبقي مرتبط خاطب متجوز، هي حياتك ع السوشيال ميديا .. هي خلاص كده ، الناس معتبره أن أي تصرف منك هو انعكاس لعلاقتك دي .. يعني انت اي حاجه هتقولها فهي علي خطيبك ، أي شئ هتكتبيه ف انتي تقصدي بيه جوزك ،
تدخل تكتب من باب المشاركه وفك الضيق مثلا ، إدعولي يا جماعه بظهر الغيب .. تدخل صاحبتها تكتب لها، كلنا نصحناكي يا رضوي إنه مش كويس وطبعه صعب .. ربنا يخلصك منه عاجلا غير آجل ويرزقك بداله اللي يقر عينك .. طب ليه يا ستي .. افرضي الراجل قارر عينها وكويس وهي عايزه الناس تدعيلها تعدي في الامتحان، تطلع الرخصه ، يرزقها بفلوس .. اي حاجه .. ليه لازم يكون هو السبب ،
يدخل يكتب ساعات بنبقي جوانا الكلام بس مش لايقيين الشخص المناسب اللي نبوح قدامه باللي جوانا .. يدخل أخوه يكتب له ، هون عليك يا حبيب أخوك مفيش واحده تستاهل حزنك ده .. يا ابني ده بوست اكليشيه تافه فلات أخوك ناقله من علي النت عادي من باب جذب الاهتمام مش أكتر .. مال الست طيب .. هي عملت ايه ؟ .. أخوك تافه وبيجمع تعاطف وإهتمام عشان مش سوي عادي،
خد عندك أي أغنية لأي مغني في أي موضوع هتشيرها ف انت مشيرها انعاكس لحالتك العاطفيه، وقصدك بيها خطيبتك .. مش وارد تكون مشيرها عشان مجرد انها عجباك مش أكتر .. لو شيرت طوبه فوق طوبه بتاعه امال ماهر اللي بتغنيها لمصر ، هيدخل واحد يقولك ، حبيبي يا ابو حميد ربنا يجمع بينكو عن قريب في بيتكو الجديد ويسمعنا عنكو سمع خير .. يا بني بيت ايه اللي هيجمعنا فيه دي اغنيه وطنيه .. يا حبيب اعيش وأشوفك انت وأشرقت في بيتكو الجديد منورينه وماليينه سعاده .. يا ابني اشرقت ايه دي الاغنيه لحنها حلو .. يا حبيبي ربنا يتم عليك الشقه الجديده يا رب ويرزقك خيرها زيكفيك شرها،
أي ايه قرآنيه، ف انت بتدعي علي بيها مراتك ، أي حديث ف انتي موجهاه لجوزك عشان يتعظ ويبطل اللي بيعمله ، أي مقوله مأثوره فهي مقصوده ، أي مشهد مسلسل فهو موجه .. أي نفس هتتنفسه علي أي بلات فورم خلقه ربنا ، فده مش رأيك ولا ده دماغك ، ده رساله انت عايز توصلها للانسانه اللي معاك .
