جيبي معاك حكاية

بقلم الشاعر – محمد قاسمي

بر الهمامّة

جيبي معاك حكاية

علّي مضى من سيرتك جدّاية

وحطّي عوافي هادجة واتدفّي

وبرّاد تاي مصفّي..

وكانون من جمراتها متكفّي…

جيبي معاك حكاية

علّي مضى من سيرتك جدّاية

واختم على الي فات قْول رواية

و رحلة سفر في الذاكرة واتشفّي

وقت الرّحى و الحوش و السدّاية

و احفر على مرحولهم في كفّي…

احكي على الي فات

وايام سمحة غادرت ومشات

فيها كرم و جود و روايات

مهما حكيتي بسيرتك ما توفّي…

جيبي معاك حكاية

علّي مضى من سيرتك في اسمي

لمسة صفاء مشتاقْها و لمّات

و يبقْى رحيق ايّامها متخفّي…